USAID ප්‍රදාන මගින් සිදුවන සංවර්ධන කටයුතු වේගවත් කිරීමට පියවර…

USAID ප්‍රදාන මගින් සිදුවන සංවර්ධන කටයුතු  වේගවත් කිරීමට පියවර…

අන්තර්ජාතික සංවර්ධනය සඳහා වූ එක්සත් ජනපද ආයතනයේ (USAID), ප්‍රදාන මගින් ශ්‍රී ලංකාව තුළ සිදුවන සංවර්ධන කටයුතු වේගවත් කිරීමට පියවර ගැනේ.

ජනාධිපති ගෝඨාභය රාජපක්ෂ මැතිතුමා සහ අන්තර්ජාතික සංවර්ධනය සඳහා වූ එක්සත් ජනපද ආයතනයේ (USAID) ශ්‍රී ලංකා කාර්යාලයේ අධ්‍යක්ෂ රීඩ් ජේ. ඇෂ්ලිමන් (Reed J. Aeschliman) මහතා සමග අද (07) පස්වරුවේ ජනාධිපති කාර්යාලයේ පැවති හමුවේදී මේ පිළිබඳ සාකච්ඡා කෙරිණ.

USAID ප්‍රදාන මගින් දැනටමත් රට තුළ සංවර්ධන කටයුතු ගණනාවක් සිදු කෙරෙමින් පවතී. ඒවායේ ඇතැම් ව්‍යාපෘති විවිධ හේතූන් මත අක්‍රීයව පවතී. ඊට බලපා ඇති කරුණු පිළිබඳව සොයා බලා, එම සංවර්ධන කටයුතු කඩිනමින් නිම කිරීම පිළිබඳව දෙපාර්ශ්වය අතර සාකච්ඡාවට ලක්විය.

“සෞභාග්‍යයේ දැක්ම” ප්‍රතිපත්ති ප්‍රකාරව රට තුළ දැවැන්ත සංවර්ධන ක්‍රියාදාමයක් සැලසුම් කර තිබේ.  ඊට අනුකූලව USAID ප්‍රදාන මගින් කෙරෙන සංවර්ධන කටයුතු වඩා ඵලදායීව ක්‍රියාවට නැංවීමේ අවශ්‍යතාව ජනාධිපතිතුමා විසින්  පෙන්වා දෙනු ලැබිණි.

ඇමෙරිකා එක්සත් ජනපදයෙන් පරිත්‍යාග කෙරුණු ඩොලර් මිලියන 6කට අධික කොවිඩ් මර්දන වෛද්‍ය සහ සෞඛ්‍යාරක්ෂණ උපකරණ රැගත් විශේෂ ගුවන් යානයක් පසුගියදා මෙරටට ළඟා විය. ඊට සිය ස්තූතිය පළ කළ ජනාධිපතිතුමා කොවිඩ් මර්දනය වෙනුවෙන් රජය ගෙනයන වැඩපිළිවෙළ පිළිබඳව ද දැනුවත් කළේය.

ඇමෙරිකානු තානාපති කාර්යාලයේ නියෝජ්‍ය දූත මණ්ඩල ප්‍රධානි කෙලී මාර්ටින් (Kelly Martin), අන්තර්ජාතික සංවර්ධනය සඳහා වූ එක්සත් ජනපද ආයතනයේ වැඩසටහන් අධ්‍යක්ෂ, ක්‍රිස්ටෝපර් ෆෝලි (Chistopher Foley), ජනාධිපති ලේකම් පී.බී. ජයසුන්දර, මුදල් ලේකම් එස්.ආර්. ආටිගල සහ මුදල් අමාත්‍යාංශයේ විදේශ සම්පත් පිළිබඳ අධ්‍යක්ෂ ජනරාල් අජිත් අබේසේකර යන මහත්වරු මේ අවස්ථාවට එක්ව සිටියහ.

Share This Post